شیر پاؤ کالونی میں قیامت خیز آتشزدگی: باڑے میں موجود قیمتی مویشی اور چارہ خاکستر، بھاری مالی نقصان
لانڈھی آتشزدگی: فائر بریگیڈ کی بروقت کارروائی، مزید دکانوں اور مکانوں کو جلنے سے بچا لیا گیا
کراچی اپڈیٹس 24) کراچی کے علاقے لانڈھی، شیر پاؤ کالونی میں واقع ایک مویشی باڑے میں اچانک بھڑک اٹھنے والی آگ نے تباہی مچا دی۔ اس افسوسناک واقعے میں لاکھوں روپے مالیت کی 8 بھینسیں جھلس کر ہلاک ہو گئیں، جبکہ باڑے کا چھپرا اور وہاں موجود بھاری مقدار میں چارہ بھی جل کر راکھ ہو گیا۔
آگ کی شدت اور ریسکیو آپریشن
تفصیلات کے مطابق لانڈھی 89 چاول گودام روڈ پر قبرستان کے قریب واقع باڑے میں اچانک آگ لگی جس نے دیکھتے ہی دیکھتے پورے احاطے کو اپنی لپیٹ میں لے لیا۔ آگ کی اطلاع ملتے ہی کے ایم سی فائر بریگیڈ کی 3 فائر ٹینڈرز موقع پر پہنچیں اور ریسکیو آپریشن شروع کیا۔ تقریباً ایک گھنٹے کی سخت جدوجہد کے بعد آگ پر قابو پایا گیا۔
مالی نقصان کا تخمینہ
فائر بریگیڈ حکام کا کہنا ہے کہ آگ لگنے کی فوری وجہ معلوم نہیں ہو سکی ہے اور نہ ہی ابھی تک مکمل نقصان کا حتمی تخمینہ لگایا جا سکا ہے۔ تاہم، باڑے کے عملے نے اپنی مدد آپ کے تحت کئی مویشیوں کو بحفاظت نکال لیا، لیکن بدقسمتی سے 8 بھینسیں بروقت نہ نکالے جانے کے باعث ہلاک ہو گئیں۔
رہائشی علاقہ بچ گیا
فائر بریگیڈ کے عملے نے مستعدی کا مظاہرہ کرتے ہوئے آگ کو قریبی مکانوں اور دکانوں تک پھیلنے سے روک دیا، جس سے ایک بڑی تباہی ٹل گئی۔ متاثرہ باڑے کے مالک اور عملے میں اس بڑے جانی و مالی نقصان پر گہرے دکھ کی لہر دوڑ گئی ہے۔
Comments
Post a Comment